[[أشيل من الأيام وأحط وأشيــــل ]]

بسم الله الرحمن الرحيم

وهذه إحدى قصائدي ....

• ****
• أشيل من الأيام وأحط وأشيــــل
• وأشيل ماشالت ظهور الجمالــــي
• لي هقوة (ن) أصعد بها الجدي وسهيل
• ولي موقف (ن) يطلق وجيه الرجالي
• الحمل قاسي والليالي محاميل
• وسود الليالي فرقت كل غالي
• ماللوفاء بين الثعالب مقاييل
• النيس والهرباج وأم الحلالي
• وأن قصرت عن رؤوس بعض الحلاحيل
• زحول الرجال معربين الخوالي
• هل وقفة (ن) تشفي قلوب المغاليل
• حصن (ن) حصين والمواقف جزالي
• ولاتسند علومك على فاتر الحيل
• لأنذال تقصر عن فعول الرجالي
• لأنذال تنقل حكي وتحط وتكيل
• أهل الحسد في خبثها ماتبالي
• الله يطهر لأرض من شلة الفيل
• أهل النفاق مفرقين الحلالي
• اللي لهم في الشر منزال ومحيل
• معقدة صفو البشر بالهوالي
• وعلى رسول الحق سجدة وتهليل
• شفيعنا يوم الحشر والزوالي

[[رسالة الود ]]

• بسم الله الرحمن الرحيم
• وهذه إحدى قصائدي الغزليه
• يازينة المجلس وياحلوة الذوق
• ياوردة تملأ حياتي سكينـــــــــه
• يادنيتي وأحلامي وقمة الشوق
• حبك سلب قلبي وأخذته رهينه
• بعدك حرام النوم مالاج بالموق
• مشتاق لك والقلب زايد حنينه
• لك وحشة يامعتلي الروح من فوق
• ياساكن(ن) روحي مالي سنـــــــينه
• أهديك يافلانه من الورد معلـــــوق
• من مصر شوقك باعثن لك حنينه

[[ لوعة فراق الأربعين ]]

بسم الله الرحمن الرحيم

هذه إحدى قصائدي الغزليه التي قلتها في مناسبه وإليكم القصيده :

تنوض البروق وخافقي يتجه قبله
سنا بارقك جوده وعرشه ورضوانه
\\
سبح في هواء ماضيك والشوق يلعبله
وورود الهواء في غاية الود عطشانه
\\
قطفنا رحيق النحل من جذره ونبله
وغصنا بحر حبك ولؤله ومرجانه
\\
خذيتي جمال الكون في خنصرك دبله
وباقي جمال الكون خذتيه بأوزانه
\\
عليك الفؤاد يلوعه الشعف مع وبله
ولوعة قسى هجرك وبعده وحرمانه
\\
أنا ماأستطيع العيش عن عينك الخجله
غذايه وعشق الروح روضه وبستانه
\\
ألا ياعشيق الروح ياقلبه وسجله
عسى الله لايحرم عيوني من أعيانه
\\
أحبك ومغرم فيك هلاً ومن قبله
تربع غلاك بمهجة القلب وأحضانه
\\

يااااااااااافارج الكربات

بسم الله الرحمن الرحيم

\\

هذه القصيده أرسلتها لشاعر الكبير سعد إبن فايز إبن جري وهو من أعز الأصدقاء الذي

\\

أفتخر فيهم ..

\\

وهذه قصيدتي ::


يافارج الكربات وهموم وأحزان
يامالك (ن) كل(ن) بعلمك مصيره

\\
يامن بأمرك يسجد الأنس والجان
وقوتك تخضع كل نفس شريره

\\
يالله ثباتك وقت زوغات الأذهان
وأجعل لنا عسر المناهج يسيره

\\
وعنا إصرف اللي في هوى كل شيطان
وعلى دروب الشر يشعب بعيره

\\
اللي يشلون الجنايز بالكفان
ويسوق لدروب المهالك شويره

\\
يابو بدر ياكافي الشر بلشان
من واهج في الصدر مثل السعيره

\\
دنيا غداء فيها أبرق الريش شيهان
يا إبن جري دنيا غراييب وحيره

\\
وتحية مالاحت بروق الأمزان
لبو بدر ملفى الوجيه السفيره

\\

وهذه قصيدته::


ماهل غيث وأينعت منه الأغصان
مازف الأخبار السعيده بشيره

\\
يامرحبا ترحيب مشفي وشفقان
لعلوم من يثنون عند الكسيره

\\
حي الرساله والنبأ من بليهان
اللي شمل الأقصى والأدنين خيره

\\
سفر مبارك ريف ضيف وجيران
ومجير من ينشد من الضيم جيره

\\
فزاع في اللازم لربع وصدقان
أبشر وحاضر منطقه وتعبيره

\\
يفديه من يفتح للاعذار بيبان
هزيل هقوات والارياء ضريره

\\
من خلقته ماذكر له في الملاء شأن
حكيل حد صادي(ن) في جفيره

\\
جعله يابن هباش يفديك قمحان
اللي عن القاله يمينه قصيره

\\
هذا ودنيا إبن أدم أحداث وأزمان
نوب تجي حلوه ونوب مريره

\\
ان ساعفت جاتك بورد وريحان
وكستك جوخ وحاطتك بالبريره

\\
وان عاندت حطتك شارة ونيشان
وجنك بلاويها الجوامح مغيره

\\
ولا يضد أجوافها كيف ماكان
ويودع مصايبها الكبيره حسيره

\\
الا إحتساب وصبر (ن) وقوة إيمان
وقيام ثلث الليل الأخر وتيره

\\
يكفيكها من كان ثالث للأثنان
في لحظة مايذكر العبد غيره

\\
وأسلم وسلم وأستلم جزل وأوران
وعسى يا بو فيصل في الامر خيره

\\

[[نفوز بشفاعة صفوة الخلق لاصحابه]]

بسم الله الرحمن الرحيم

\\

والصلاة والسلام على أشرف الأنبياء والمرسلين عليه أفضل الصلاة وأتم التسليم ,,,

\\

هذه القصيده كتبتها وأمل أن تنال إعجابكم ودمتم بخير وكل عام وأنتم بخير,,,

\\


ياكثر الرجال وياكثر ما أنجبت حـوا
وياقلهـم لاكشـر الذيـب بأنيـابـه

\\
شملهم مسمـى رجـال لكـن يالـوا
بكل(ن)يشاف الفعل والاسم متشابـه

\\
مسار المراجل عسر بالحيـل وملـوا
على اللاش ولا الحر لو عسر ماهابه

\\
كريم السبال ان سرح الوجد وان ضوا
لاجت حزته واللازم اللازم اصخى بـه

\\
ولاناشـد عمـن يكثـر ومـن شـوا
لو ان العرب تخلي مراحه ومزهابـه

\\
يحوش المراجل عادة فيه مـن جـوا
على دروبها يتعب لها الذات وركابـه

\\
ولاهو بشفق تذكر الناس وش سـوا
على فطرته والقيل ماهو بيشقى بـه

\\
بها يقصـد العالـم بجهـره ومانـوا
من ارهى عليه الخير وادرك له اسبابه

\\
مع اهل التقى ومنادي الفـرض لادوا
يفز استجابه للنداء الحـق ورحابـه

\\
يبي الفوز يوم تبسط الصحف وتطـوا
يبي يأخذ بيمنـاه بـإذن الله كتابـه

\\
عسانا بيوم يجمع ابنـاء آدم وحـوا
نفوز بشفاعة صفوة الخلق لاصحابـه

\\

!! الإنكسار !!

بسم الله الرحمن الرحيم

\\

السلام عليكم ورحمة الله وبركاته

\\


سرب الحمام وهجرة أيام المصير
والجدب وسنين المحل وعصورها

\\
والعثره القشرا وموتات الضمير
وحرمان نفس الجود من ميسورها

\\
ومعانق الجوزاء بعد هب الهجير
ومن ينقذ الأموات وسط إقبورها

\\
وسود الجهام اللي على الدبكه تسير
أمالها وعقولها ماحققت منظورها

\\
تطرب على صوت الغضب وتعاقب الطفل الصغير
ياشرهة الحسناء على رجالها بحضورها

\\
شاب الزمان ولا بقى شيء يصير
ياحيلة الله من يعذر الناس في مقدورها

\\
هذي نهاية من عجز لا يأصل الجم الغزير
يقنع بميسور الليالي عقب غاص إبحورها

\\
مابين جدب البيد وصراخ الفقير
وعبرة زمان ضيقة حنجورها

\\
يالله غفرانك وعفوك ياكبير وياقدير
ياذا الجلال اللي بسطت أراضها وإبحورها

\\

مجاراه بين (أسأل عن اللي حصل)

بسم الله الرحمن الرحيم

\\

هذه القصيدة من الأستاذ الشاعر المبدع حسين بن معوضه الحبابي موجهه لي وسأكتب

\\

قصيدته ومجاراتي له

\\

وهذه قصيدة حسين:

\\


أسأل عن اللي حصل وأرجع وأعيد السؤال
وأقول عل العرب ماتفسد أخلاقها

\\
ويهمني غالي المذهب حميد الخصال
اللي مطياه في درب الوفاء ساقها

\\
شيخ فعوله تنومس كل ماجاء مجال
مراجله في المعالي لاح براقها

\\
قطعتنا ياسفر حتى من الإتصال
والنفس ماتمشي إلا بإذن خلاقها

\\
ماقلت باجيك ولا قلت هيا تعال
نمشي لنا طرقة والناس بأوفاقها

\\
والناس يامسندي ماهم على كل حال
ناسا تبيها وناس تبغي إفراقها

\\

وهذا ردي عليه:


يا الله ياوالي أمر أيامها والليال
يامن خلقت العباد وبيدك أرزاقها

\\
ياباسط ماجعلت أوتادهن الجبال
ورفعت سبع ومنها أياتك اشراقها

\\
يالله تهون علينا المكربات الثقال
وألطف بنا يوم تطوى البيد وأفاقها

\\
وأجعل لنا من وهج يوم التلاقي ظلال
أرواحنا ياالله إجعل لطفك أرواقها

\\
يابو سفرحن وهالدنيا الرشا والمحال
صلفة طبوع وحن شفقين لأشفاقها

\\
نوب تحدانا عصاها مثل حدي الجمال
ونوب تمذلق كفانا الله تمذلاقها

\\
ياما أحرمتنا من مواجه كرام السبال
اللي بحور المراجل غاصوا أعماقها

\\
مثلك وشرواك ياذرب النبأ والفعال
اللي لوفاتت عليك يهون ملحاقها

\\
وحنا لو إنانحوش دقاقها والجلال
ماجت به اليوم باكر راح بأشناقها

\\
حنا والأيام في حرب ضروس ونزال
الله يخارج من الأيام وشقاقها

\\

&&&الوسام&&&

بسم الله الرحمن الرحيم

\\

كتبت هذه القصيدة في أخي العميد.عبد الله بن سالم بن خلبان الذي كان من حرصه علي كلما

\\

حصل على ترقية بلغني أولا بأول وحيث أنه من الرجال الأفذاذ العصاميون الذين يرفضون

\\

الهامشية والحقيقة أن له علي معاريف كثيرة أسأل الله الكريم له حياة سعيدة .
\\

يارب أنا أسألك حياة كريمه
بأمرك تعز الدين وتعز الأوطان

\\
وتعز كل أهل النفوس الحشيمه
أهل المبادي والمكارم والإحسان

\\
مبروك ياشيخ فعوله قديمه
عبد الله الخلبان من نسل قحطان

\\
مبروك والفرحه لك الله عظيمه
إي والله أفرح لك بها ياكحيلان

\\
يا بالغنايم ماهي أول غنيمه
لك كل يوم فيد ياطير حوران

\\
حشت المراجل بالهمم والعزيمه
وروابع تربع وهقوات سلطان

\\
شجاع لو أن المصايب مليمه
والحلم والحكمة لها قيد وعنان

\\
وتجود لو إن المخابي عديمه
سجيتك والجيب فاضي ومليان

\\
تسامت أمجادك شهامه وشيمه
ومروة ماهيب حين عن أحيان

\\
يوم المروة في الأوادم عقيمه
مروتك تنجب وفاء يابن خلبان

\\
ما أنسى فعولك يوم بقعا مقيمه
ياراعي الفزعات في ماض الأزمان

\\
واليوم أبارك والمشاعر حميمه
ماينكر المعروف ياكود جابان

\\
يامن تحلاك العقول الفهيمه
إليا ذكرك فلان وفلان وفلان

\\
لك سيرة تشفى الكبود السقيمه
في مجلس به مثل شرواك شيخان

\\
يامن تنال الضدمنك الهزيمه
للخير بيبان وللشر بيبان

\\
تجاهل الأجواد جور وظليمه
إللي لهم في صفحة المجد عنوان

\\
الطيب ماله بالنفوس الوخيمه
ولا يروم إلا طويلين الأيمان

\\
الطيب مثل القارة المستديمه
ومن لارقا في قارة الطيب خسران

\\
الطيب طبعك والهقاوي هميمه
رقيت بالعليا على رأس مابان

\\
يابو رياض الشعر ذعذع نسيمه
والمدح في مثلك وشرواك له شأن

\\
يازبنها لاأعطى الرعاع الخريمه
في حزة الأفعال زود ونقصان

\\
من لابة من ضدها إلا تضيمه
معروفة بأفعالها يوم الأكوان

\\
من خوك أبو فيصل تحايا جسيمه
محزمك لاجاء وقت روغات الأذهان

\\
وصلاة ربي عد همال ديمه
اليا إنهمل مامور من غر الأمزان

\\
على نبي السيرة المستقيمه
محمد الهادي إلى خير الأديان

\\

[[ الحزينة ]]

{{{{{ الحزينة }}}}}
\\
\\
\\
أيـا وجـد حالـي وجـد مـن فارقـه غالـيـه
ويا صرم قلبـي صرمـة الدلـو فـي الجمـه

\\
ويـا لوعتـي لـوعـة صغـيـر فـقـد والـيـه
ويـا ضيـم قلبـي ضيـم مـن زل فـي عمـه

\\
على اللي وقف يومه وأنا ما قدرت أوفيه
وأنا أبغى السموحة منـك تكفيـن يـا يمـه

\\
خذتني الضروف القاسية ما قدرت آجيـه
وقصرت في الواجـب وقصـرت مـن يمـه

\\
ألا يـا عظيـم الـشـان يــا مـكـرم راجـيـه
لهـا تجـعـل الـفـردوس مـنـزال وتضـمـه

\\
أنا اسألك تغفر ذنـب مـن لاذ بـك داعيـه
وتجبـر عـزا اللـي لايــع الـحـزن يلتـمـه

\\
يـا ليـت التمانـي تنفـع اللـي يبـي يفـديـه
لا أحـط العيـال بقبـر مــن ضمـنـي دمــه

\\
ويـا الله تصبرنـي لـيـا حــل بــي طـاريـه
وتجـلـى هـمـوم داخـــل الـقـلـب ملـتـمـه

\\
عسانـي فـداء لترابـه اللـي علـى رجليـه
وخفـف مـن أحـزان الليالـي ومـن هـمـه

\\

[[سيدي سلمان بن عبد العزيز]]

بسم الله الرحمن الرحيم

\\

كتبت هذه القصيده بإسم إبني فيصل لسمو سيدي الأمير سلمان بن عبد العزيـز وقـد تشرفـت

\\

أنـا وأبنـي بالسـلام

\\
عليه في مكتبه الخاص وقراءها شخصيا أسأل الله الكريم له طولة العمر ,,
\\

أبدا بذكر الولي خلاق الإنسان
علام سر البشر مرسل رسوله

\\
أرسل لكل البشر بأيات قراّن
وأيد من الوحي والأنصار حوله

\\
سن الشريعه لنا والحق قد بان
والشرك هدم أصنامه مع زحوله

\\
أستأذنك ياطويل العمر لي شأن
والشأن ماينقضي لي بالسهوله

\\
غيد القرايح تعادت تو سلمان
الكل منها يبي يكسب قبوله

\\
وأخترت منها السمين وجيت عجلان
الوقت ضيق ودنيانا عجوله

\\
أستأذنك ودي أذكر بعض الإحسان
اللي تسويه والعالم تقوله

\\
تمد يمناك دايم سر وإعلان
كرم وجود وسمو رأي ورجوله

\\
الحلم والعدل والحكمه والإيمان
والشرع دستور سلمان وميوله

\\
أبو اليتيم وسند من صار بلشان
وسعد الدريك الذي نوخ ذلوله

\\
نجد مدانه لراع الطيب والزان
رجل الوطن والمكارم رجل دوله

\\
أمير نجد مطوع كل فسقان
من هيبته الأ ُسد ترعى ومحموله

\\
عدلت بالعدل بين فلان وفلان
ولا عاد يلحق بعد فعلك عذوله

\\
لاهنت ياسيدي والسيف لاهان
لو ماحملته بكفك ويش هو له

\\
جعلت كل القبايل مثل الأخوان
ياسيدي كل وقفاتك بطوله

\\
تمت وعذري بكاد وريح ريحان
لك من ولدك الصغير وتم قوله

\\

****النصيحة الصادقة****

بسم الله الرحمن الرحيم

\\

هذه القصيدة في أكبر الأبناء أسأل الله الكريم أن ينفع بها الجميع ....

\\


يافيصل أتعبت الركايب والأصحاب
وتعبت وأتعبت القدم والنجيبه

\\
وصبرت صبر أيوب والنور ماغاب
بأمر الله المعبود موفي طليبه

\\
وأقدم على الشدات يابوك ماهاب
والعبد في دبرة وليه وغيبه

\\
من أجل عز النفس نبحث للأسباب
ومن لاتعب ماذب رأس الرقيبه

\\
الصبر ثوب العز راعيه ماخاب
وفي الصبر للأنسان عزه وهيبه

\\
يافيصل أوصيك ياطيب طاب
إحرص على وصيتي في المغيبه

\\
أوصيك في تقوى الولي رب الأرباب
رب خلق الأنسان والمعتنيبه

\\
وأركان رب البيت لك نور وحجاب
يحفظك إذا كبرت عليك المصيبه

\\
يابوك أناأوصيك في أمك والأقراب
وأخوانك إحرص لايجيهم غليبه

\\
والعلم فإ ن العلم نور للألباب
من لاتعلم جاهلا وشتبيبه

\\
وترى الشرف والدين يابوك غصاب
من لاحفظ لاثنين ياكبر عيبه

\\
والمنسب الطيب ترى العرق جذاب
دور على شرواك ماهي غريبه

\\
والجار فإن الجار له حق وحساب
من لايحسب حقوق ربي غديبه

\\
وأحرص ترافق من تردى ومن عاب
من رافقك يابوك طيبك بطيبه

\\
رافق هل الطاعه هل الدين وكتاب
تسلم من الأشرار وأهل المعيبه

\\
خذ الحكم يابوك من واحد شاب
يبغي لك التوفيق والله حسيبه

\\
هاذي وصاتي فيك ياذيب ياعقاب
يامعرب الجدين مافيك ريبه

\\
فيك الأمل والظن يابوك ماخاب
باني عليك أمال عمر صعيبه

\\
وصلاة ربي عد ماهب هباب
على رسول كلنا نهتديبه

\\

[[صرخة غضب ]]

بسم الله الرحمن الرحيم
\\

تـرى الشياهيـن تصعـد عاليـات الجـبـال
والأحـرار تدمـي مخالبـهـا مــن أفعالـهـا

\\

لاتحسـب إنـك بديـت النايـفـات الـطـوال
غــــروك الأشــرارفــال الله ولا فـالـهــا

\\

الحمـل يـافـلان ماشـالـه يـكـون الجـمـال
ولا ضعيفـيـن الأنـفـس ضيـعـت حـالـهـا

\\

حلك غلط ياذكي ماأدركت معنـى السـؤال
دخـلــت فـــي ظـلـمـة الأيـــام وهـوالـهـا

\\

ماكـل بــرق يـنـوض يـصـب وبــل زلال
والفرق واضح مابيـن الشمـس وهلالهـا

\\

والناس تعرف تواريـخ العـرب والرجـال
والـبـيــد مـاقـدهــا إلا نــايــف جـبـالـهـا

\\

مانـقـدر نـغـيـر الـتـاريـخ هـــذا مـحــال
والغـاب أسـوده مـن إللـي ينكـر أشبالهـا

\\

يوم العـزاوي وساعـات القشـر والنـزال
وبقعـاء يشيـب رضيـع المهـد والوالـهـا

\\

ترصاحبـك ياالسنافـي مـاذكـر لــه فـعـال
يامـنـكـر سـيــرة الأبـطــال وأفـضـالـهـا

\\

أعماك حـب المصالـح والهـوى والهبـال
يالـعـن أبــو شـجـرة الـزقـوم وظـلالـهـا

\\

وبعض السوالف على الرجال عيب وبال
والـقــوم تـعــرف بسـادتـهـا وجـهـالـهـا

\\

والله مـاأنـتـه بـمـكـره يـاولـيـد الـحــلال
مـن جــاب لــه زمــة يصـبـر ويشتالـهـا

\\

قـارون ولـى وشانـه والـذهـب والـغـلال
وغيـره مـن أقفـت يغنـي البـوم بحلالهـا

\\

لاتعـتـزي بالمقـابـر والجـهـل والـخـبـال
وتقـول أنــا عنـتـرة والـنـاس باحتالـهـا

\\

الله يـعـز الحـكـومـه سـيــدة كـــل خـــال
وتسلـم لنـا شجـرة ال سـعـود وأجيالـهـا

\\

ماينكـر أمجـاد مـرويـن القـنـا والـسـلال
مـن يـؤمـن بمـوعـد الأرواح وأعمالـهـا

\\

[[الأصـــــــــــدقاء]]

بسم الله الرحمن الرحيم ,,

أدور الأعـذار دايـم لأصـدقـاي
ولايغيرني الزمـن مهمـا حصـل

عن الجفا والصد يمنعنـي وفـاي
وأهل الوفاء لي ربع وأصحاب وأهل

ولا كل براق ينـوض يهـل مـاي
ولا يشيـل الكـايـدات إلا جـمـل

والهقوه إللي ماتنور لـي سمـاي
أزلهـا لـلـي ترقيـنـي جـبـل

ولا أسند الهقوه على قوة عصـاي
ماللصعـاب إلا جبـل ولا زحــل

يالله ياللـي فيـك معقـود رجـاي
تصلح لي النية وتصلح لي العمـل

وأجرني من إبليس والنفس وهواي
وأيقظني من الغفلة وطـول الامـل

وعلى دروب الخير سدد لي خطـاي
وأعصمني من الإثم وأسباب الجهل

خاااااااااااااااااطرة مصر

بسم الله الرحمن الرحيم


تنقل مع الأيام في طاعة المعبود
وما خاب من كان الإله وكيله

وتمسك بحبل الله وأحرص من المنقود
ولا تتبع الزلات تبلش بك الحيله

ولا تأمن الأنذال واللاش والحقود
تفرق جموع وتزرع الشر وتجيله

نصيحة محب في حياته رقى سنود
هدفنا شريف ولا ندور على العيله

ولا نطلب إلا طاعة الواحد المقصود
عسى الله يغفر ذنبنا يوم نأتيله

حفاة عراة لاقريب ولا مسنود
نهار يشيب الرأس شدة تهاويله

أحد يأخذ كتابه بيمنى السعد والجود
ومن قصر بدنياه في الدين عزيله

هاذي تالية دنيا التنافس وحب الزود
وحيد بقبر والمخاليق تدعيله

هذا موجز يامستمع والرجال شهود
وتحيات أبو فيصل عدد وابل الخيله

**مرارة الصمت**

بسم الله الرحمن الرحيم


هبت عواصف برد الأيام ياحول
يا حول من الأيام برده وحره

العمر يجري والسنه عدة فصول
نجاهد الأيام كره و فره

ياكبر أملنا والرجا ء دوم موصول
وأحلامنا عطشى والأيام مره

نصبر على الشدات ونقول بتزول
ولاظنتي بعد التعاسه مبره

نحمل مع الأيام صكات وحمول
وأرشيف بقعاء في المحاني مقره

وصدر من الأيام مغلق ومقفول
متجنب عثرات خيره و شره

من لاشرب من عيلم الري مذلول
يموت عطشانٍ ولا أحد يسره

دنيا بها الحيين رحال ونزول
كل وراء الحاجات قصاص جره

ويعيش فيها صاحي الفكر مذهول
وسود الليالي كل حي تفره

تبلش بها ألافكار وتحيَّر عقول
برقاء لجهال العواقب مغره

عسى ركايبنا بلا خطم وحمول
تروح منها بالخفايف مسره

[[تنعى بلاد العرب وديار الإسلام ]]

بسم الله الرحمن الرحيم

السلام عليكم ورحمة الله وبركاته ..............وبعد .....

كتبت هذه القصيده عزاء في فقيد الأمه ورمز السلام القائد العظيم خادم الحرمين الشريفين الملك فهد بن عبد العزيز طيب الله ثراه ورحمة رحمتا ً واسعه وأسكنه فسيح جناته وقد نزلت هذه القصيد في عدد من الجرائد جريدة الرياض يوم الثلاثاء بتاريخ 4رجب 1426هـــ وكذلك في جريدة المدينه يوم الاربعاء بتاريخ هــ رجب 1426.........


تنعى بلاد العرب وديـار الإسـلام
فقيـد الأمـه خـادم الحرميـنـي

تنعى فهد فجـر المكـارم والأيـام
خـادم بيـوت الله دنيـا ودينـي

شيخ صنع تاريخ بإصرار وإقـدام
بالفكر والسطوه وفعـل اليمينـي

يالله عسى روحه مع خيـر الأنـام
في جنة الفردوس مـع الأولينـي

أعزي ال سعود في موت ضرغـام
منار الإسـلام الحليـم الفطينـي

وأعزي اللي صابه الذعر وأنضـام
حزن على فقد الحسـام السنينـي

لكن عزانا فـي صواريـم حكـام
غيث الديـار وحربـة الطامعينـي

ال السعود اللي لهم دور وإسهـام
في رفعـة الإسـلام والمسلمينـي

بعـده يتمـون المسيـره لقـدام
موحديـن الــرأي متكاتفيـنـي

أهدافهم في خدمـة الأمـه إلمـام
الله لهـم علـى الأمانـة يعينـي

وحنـا نبايعهـم مواليـن خـدام
وأعوان وأنصار لهـم مخلصينـي

بيعة يا أبو متعب وعهد لك إلـزام
على الولاء والطاعـة معاهدينـي

وأيضا يا أبو خالد عهدنا والإقسام
نقسم ونوفي العهـد متضامنينـي

حيث إنكم للحق رايـات وأعـلام
ياعلكـم فـي حكمكـم خالدينـي

أنتوا كعام الضد وعـلاج الأسقـام
وأنتو ا مع كثر الشكوك اليقينـي

أنتوا سلايل من تزهل ومـن قـام
بإطفاء الفتن حتى أمن الخايفينـي

عبد العزيز اللي جمع شمل الأقوام
وأسدى الوفاق مقـدي التايهينـي

عساه في الفردوس من ربه إكرام
ويعزكـم ويديمـكـم سالميـنـي

[[شجـــــــــــــــاع وداهيه]]

بسم الله الرحمن الرحيم

هذه القصيده في من قابل المعروف بالإســــــــــــــــــــــــــاءه ,,


ياللي تحسب إنك بهالدنيـا الوحيـد
وتقول أنـا رجـل شجـاع وداهيـه

نصيحتـي لـك يالفلانـي لاتعـيـد
عليـك بالنعـمـه ودرب العافـيـه

قبـل (ن) تـدور لسلامـه ماتجيـد
وتطيح في إيدين (ن) نشـاط وافيـه

وتكسر عظامك مثل كسـار الجريـد
وياليتهـا ذيـه وتصبـح شافـيـه

حنا بظـل اللـي يقصـون الحديـد
أمـن وأمـان والعـرب متكافـيـه

لو إنهـا يـوم الملاقـى والضديـد
منزالـك وشـرواك خلـف السافيـه

ماينكـر المعـروف ياكـون البليـد
يامنكـر المعـروف خذهـا كافـيـه

أحد(ن) كسب له فيد وأحد(ن) مايصيد
إلا الرخامـه والعـلـوم الهافـيـه

مالك مع الظفـران ياصغيـر رصيـد
رصيـدك النمـه وشيـل الخافـيـه

الطيب فازوا به هل الـرأي الرشيـد
زحول الرجال اللي تحسـب القافيـه

يصعب عليك الطيب ياساعي البريـد
دربك صعيب وأنـت رجلـك حافيـه

رسالتي هـاذي لشخصـك والمزيـد
عليـك بالنعـمـه ودرب العافـيـه

[[ الأمير بندر بن محمد بن عبد الرحمن ]]

بسم الله الرحمن الرحيم ,,

هذه القصيده كتبتها في سمو الأمير : بندر بن محمد بن عبد الرحمن

والذي له علي أفضال كثيره ولايستغرب منه الوفاء أسأل الله الكريم أن يمده بالصحه والتوفيق ومهما كتبت فيه من القصائد لن أوفيه حقه , ونتشرف في سموه الكريم حيث نحن خواله ,,

ياسيـدي بنـدر ذرى مستجيـره
يافزعة اللي وقته أحـلام وأمـال

**

يا أبو سعود أنت الرجاء والذخيره
يامنقذ المضهود ياذرب الافعـال

**

ياسيدي دنيا البنـى أدم قصيـره
وحنا عليها بين نـازل ورحـال

**

ومنها لك الله مانبي إلا الستيـره
وأعراضنا تسلم من القيل والقال

**
فزعتك يامروي السيوف الشطيره
تدرك طلب خادمك يانسل الأبطال

**

والله ماقصـدي تجـاره وغيـره
قصدي بقايا العمر مستورة أحوال

**

أنتابني من جاير الوقـت حيـره
وقت تساوى فيه رجلـي وخيـال

**

سجيت به الأقدام في كـل ديـره
وعودت وحمولي من أهواله إثقال

**

وأسندت لك شكوى خطاي العثيره
ياجابر العثرات ياذخـر الأخـوال

**
يامن لمجدك بين الأمجاد سيـره
وعلى شرف وردتنا صافي الجال

**

حنا خوالـك محتميـن القصيـره
قحطان هل مجد قديـم ولايـزال

**

ياسعد من حن فزعته في الكسيره
تفخر بنا كل القبايـل والأجيـال

**

شرفتنا يابنـاء حمـاة الجزيـره
أفعالك تشرف بني العم والخـال

**
وإختامها وإن كان في شيء خيره
الخير والخيره وفزعاتـك الفـال

**

وأكيد مايقـوى يحـل العسيـره
إلا أنت ياللي للشرابيـك حـلال

**

أنتم هل العوجاء حماة المسيـره
من حدكم يرمى براسه على الجال

**

وأنا دخيلـك يـاذرى مستجيـره
من ضيم وقت في بلاويه ماأحتال

**

وصلاة ربي عد ما أنشى غثيـره
على رسول خصـه الله بالأنفـال

$$$العم والخال$$$

بسم الله الرحمن الرحيم

يامسوي الفنجال بالك تمده
للي يضيع واجب العم والخال

عده على من تدفق السمن يده
والأقراب في بيته مقيم ورحال

إللي مابيح شين الأيام سده
ظل لمن يقصاهم الوقت مدهال

بحر العطاء في حال جزره ومده
وعن قوء بأسه ينتحي كل عيال

حر على سمان المكارم مهده
عسى الغناة وطولة العمر له فال

[[لابـــــــــاس ياقلب حموله كثيره]]

بسم الله الرحمن الرحيم

السلام عليكم ورحمة الله وبركاته,,

أمل أن تنال هذه القصيده رضاكم وإستحسانكم ولكم التحيه.....


لاباس ياقلب حموله كثيره
حمله ثقيل وشال حمله لحاله

شبحه بعيد عن الشبوح القصيره
حر تعلى فوق قمة جباله

صبر وشيمه والهقاوي كبيره
هواه مجد ولاتفوته جماله

والدين مبدأ للوجيه السفيره
والحرز في يوم(ن)كثير هواله

يالله ياللي مالنا رب غيره
ولرضاك نسجد يارفيع الجلاله

عبدك ماغيرك ياولي يستجيره
لاصار في قبر وحيد لحاله